“Meros International Hospital” Milliy akkreditatsiyadan muvaffaqiyatli o‘tdi

Avval xabar berilganidek  mamlakatimizda tibbiyot tashkilotlarini Milliy akkreditatsiyadan o‘tkazish tizimi amaliyotga joriy etildi.

Ushbu tizim doirasida Tibbiyot tashkilotlarini litsenziyalash va akkreditatsiyalash markazi tomonidan tibbiyot muassasalari Milliy akkreditatsiya standartlari asosida baholanmoqda.

Navbatdagi baholash natijalariga ko‘ra, Samarqand shahrida faoliyat yurituvchi “Meros International Hospital” ko‘p tarmoqli tibbiyot markazi Milliy akkreditatsiyadan muvaffaqiyatli o‘tdi va oliy toifa bahosiga loyiq deb topildi.

Shu munosabat bilan mazkur tibbiyot muassasasida Milliy akkreditatsiya sertifikati topshirish marosimi o‘tkazildi. Tadbirda Sog‘liqni saqlash vazirligi, Tibbiyot tashkilotlarini litsenziyalash va akkreditatsiyalash markazi mutasaddilari hamda davlat va nodavlat tibbiyot muassasalari vakillari ishtirok etdi.

Tadbir doirasida “Meros International Hospital” bo‘ylab marshrut tur ham tashkil etildi.