Tibbiy faoliyatni yo‘lga qo‘yishda klinika joylashgan binoning nafaqat tibbiy xizmat ko‘rsatish uchun qulayligi, balki amaldagi sanitariya va shaharsozlik normalari hamda qoidalariga muvofiqligi ham muhim hisoblanadi. Litsenziya olish jarayonida ushbu talablar ham e’tiborga olinadi.
Shu o‘rinda ko‘pchilikni qiziqtiradigan savol tug‘iladi: ikki yoki undan ortiq qavatli binoda faoliyat yuritadigan klinikada lift bo‘lishi kerakmi?
Amaldagi talablarga ko‘ra, ikki va undan ortiq qavatli binolarda, jumladan tibbiyot muassasalarida ham, nogironligi bo‘lgan va harakatlanish imkoniyati cheklangan shaxslarning yuqori qavatlarga erkin chiqishini ta’minlash uchun lift yoki maxsus ko‘tarish moslamalari o‘rnatilishi kerak.
Mazkur talab tibbiyot tashkilotida barcha fuqarolar uchun teng va to‘siqsiz sharoit yaratishga qaratilgan. Chunki klinikaga murojaat qiluvchilar orasida nogironligi bo‘lgan shaxslar, keksalar hamda mustaqil harakatlanishi qiyin bo‘lgan bemorlar bo‘lishi mumkin. Ularning zarur tibbiy xizmatlardan foydalanish imkoniyati bino qavatiga bog‘liq bo‘lib qolmasligi lozim.
Shu sababli tibbiyot tashkiloti uchun bino tanlash, uni rekonstruksiya qilish yoki yangi klinikani loyihalashtirish jarayonidayoq to‘siqsiz muhit yaratish talablarini hisobga olish muhim.
Huquqiy asoslar
Ushbu talablar bir qator normativ-huquqiy va texnik hujjatlarda belgilangan.
O‘zbekiston Respublikasi Vazirlar Mahkamasining 2022-yil 21-fevraldagi 80-son qarori bilan tasdiqlangan *“Litsenziyalash tartib-taomillarini tashkil etish to‘g‘risidagi yagona nizom”*ga muvofiq, tibbiy faoliyatni amalga oshirishda foydalaniladigan bino va xonalar belgilangan talablarga javob berishi lozim.
Shuningdek, O‘zbekiston Respublikasi Qurilish va uy-joy kommunal xo‘jaligi vazirining 2025-yil 8-yanvardagi 01/2-1-son buyrug‘i bilan tasdiqlangan ShNQ 2.07.02-24 “Qurilish obyektlarini nogironligi bo‘lgan va hayot faoliyati cheklangan shaxslar hamda keksalar ehtiyojini inobatga olgan holda loyihalashtirish” shaharsozlik normalarida bunday shaxslarning binolardan to‘siqsiz foydalanishini ta’minlash bo‘yicha talablar belgilangan.
Bundan tashqari, 0020-22-son SanQvaN — “Davolash-profilaktika muassasalarini loyihalashtirish, qurish va ekspluatatsiya qilishning sanitariya qoidalari, normalari va gigiyena normativlari” talablariga ham rioya etilishi zarur.
Xulosa
Demak, ikki va undan ortiq qavatli binoda joylashgan tibbiyot tashkilotida nogironligi bo‘lgan va harakatlanish imkoniyati cheklangan shaxslarning yuqori qavatlarga erkin chiqishini ta’minlash uchun lift yoki maxsus ko‘tarish moslamasi o‘rnatilishi kerak.
Bu talab faqat litsenziyalash jarayoni bilan bog‘liq masala emas. Eng avvalo, u tibbiy xizmatlarning barcha uchun ochiq, qulay va teng sharoitda ko‘rsatilishini ta’minlashga xizmat qiladi.
IQ Tech
