Tibbiyot tashkilotlarini litsenziyalash va akkreditatsiyalash markazida xodimlarning bo‘sh vaqtini mazmunli tashkil etish, jamoada sog‘lom muhitni mustahkamlash hamda intellektual sport turlariga qiziqishni oshirish maqsadida shaxmat va shashka musobaqasi tashkil etildi.
Musobaqada Markazning turli tarkibiy bo‘linmalarida faoliyat yuritayotgan xodimlar ishtirok etib, shaxmat va shashka bo‘yicha o‘zaro kuch sinashdilar. Bellashuvlar davomida ishtirokchilar mantiqiy fikrlash, tezkor qaror qabul qilish, vaziyatni oldindan tahlil etish va strategik yondashuv bo‘yicha o‘z mahoratlarini namoyish etdilar.
Shaxmat va shashka nafaqat sport turi, balki diqqatni jamlash, sabr-toqat, tahliliy fikrlash va to‘g‘ri qaror qabul qilish ko‘nikmalarini rivojlantiruvchi intellektual mashg‘ulot hisoblanadi. Shu jihatdan, bunday musobaqalarni tashkil etish xodimlarning bo‘sh vaqtini mazmunli o‘tkazish bilan birga, ularning kasbiy faoliyatida ham muhim bo‘lgan fikrlash qobiliyatlarini yanada rivojlantirishga xizmat qiladi.
Musobaqa qizg‘in va do‘stona ruhda o‘tdi. Har bir uchrashuvda ishtirokchilar g‘alaba uchun astoydil kurash olib bordilar, raqiblar esa o‘zaro hurmat va sport madaniyatiga rioya qilgan holda bellashdilar.
Tadbir xodimlar o‘rtasidagi jamoaviylik, hamjihatlik va o‘zaro muloqotni yanada mustahkamlashga ham xizmat qildi. Kundalik ish jarayonidan tashqari shunday sport va intellektual tadbirlarning tashkil etilishi jamoada sog‘lom raqobat muhitini shakllantirish, xodimlarning faolligi va tashabbuskorligini qo‘llab-quvvatlashda muhim ahamiyat kasb etadi.
Markazda bundan buyon ham xodimlarning ma’naviy hordiq chiqarishi, sog‘lom turmush tarzini qo‘llab-quvvatlash va jamoaviy muhitni mustahkamlashga qaratilgan turli sport hamda ma’rifiy tadbirlarni tashkil etishga alohida e’tibor qaratiladi.
IQ Tech
