Andijon, Farg‘ona va Namangan viloyatlarida xususiy klinikalar uchun seminar-treninglar tashkil etildi

Respublikaning Andijon, Farg‘ona va Namangan viloyatlarida xususiy tibbiyot muassasalari vakillari uchun seminar-treninglar o‘tkazildi. Mazkur tadbirlar viloyat sog‘liqni saqlash boshqarmalari, Tibbiyot tashkilotlarini litsenziyalash va akkreditatsiyalash markazi mutaxassislari hamda Tibbiyot tashkilotlari assotsiatsiyasi vakillari hamkorligida tashkil etildi.

Seminar-treninglar davomida xususiy klinikalar rahbarlari va mutaxassislariga tibbiy faoliyatni tashkil etishning muhim jihatlari yuzasidan batafsil ma’lumotlar berildi. Jumladan, tibbiy faoliyatni litsenziyalash talablari, akkreditatsiya jarayonlarining mazmuni va ahamiyati, tibbiy xizmatlar sifati hamda bemor xavfsizligini ta’minlash masalalari keng yoritildi.

Shuningdek, ishtirokchilarga DMED – Yagona elektron axborot tizimidan samarali foydalanish, unda ma’lumotlarni to‘g‘ri yuritish va tizimdan amaliy foydalanish bo‘yicha tushuntirishlar berildi. Seminar davomida sohadagi so‘nggi yangiliklar va amaldagi tartib-taomillardagi o‘zgarishlar ham alohida ta’kidlandi.

Tadbirlar interaktiv ruhda o‘tkazilib, ochiq muloqot shaklida davom etdi. Ishtirokchilar o‘zlarini qiziqtirgan savollar bilan murojaat qilish imkoniga ega bo‘lishdi va mutaxassislar tomonidan ularga batafsil javoblar hamda amaliy tavsiyalar taqdim etildi.

Mazkur seminar-treninglar xususiy tibbiyot muassasalarida faoliyatni to‘g‘ri tashkil etish, xizmatlar sifatini oshirish va zamonaviy talablar asosida ishlash ko‘nikmalarini mustahkamlashga xizmat qiladi.